L'HUCA trata al añu una trentena de nuevos casos de cáncer n'edá infantil

La tasa de supervivencia ta ente'l 75% y el 90%

Les unidaes d'Oncoloxía Pediátrica y Hematoloxía Clínica del Hospital Universitariu Central d'Asturies (HUCA) traten añalmente una trentena de nuevos casos de cáncer infantil, con una tasa de supervivencia ente'l 75 y el 90%.

Esti porcentaxe ye más eleváu que'l rexistráu na edá adulta, acordies cola media del Sistema Nacional de Salú y asemeyáu tamién a la de los países próximos.

La supervivencia relativa pa tolos tumores a los cinco años del diagnósticu ye del 77%, según informa güei la Conseyería de Sanidá del Principáu nel Día Internacional de la Llucha Escontra'l Cáncer Infantil.

Por tipoloxía, les leucemies, los linfomes y otres patoloxíes hematolóxiques representen más d'un terciu de los casos rexistraos, siguíes de los tumores cerebrales, los qu'afecten al sistema nerviosu, los renales y los óseos.

Nos últimos diez años lleváronse alantre nel Principáu más de mediu centenar de tresplantes de médula ósea en neños y adolescentes, con unos índices de sanamientu bien altos.

El cáncer infantil ye una enfermedá grave, cada día más curable, que rique un tratamientu complexu y munches vegaes llargu, y qu'afecta de forma determinante a la estructura personal y social d'una familia.

N'Asturies, l'abordaxe d'esta patoloxía plantégase dende l'entamu con una atención integral al neñu y el so entornu familiar y social.

L'atención al neñu diagnosticáu faise nel ámbitu hospitalariu y na Unidá de Oncohematoloxía Pediátrica del HUCA, na que personal médico y d'enfermería especializao garantiza l'asistencia integral.

La unidá ta integrada na estaya de Pediatría, trabaya coordinadamente col restu d'especialidaes pediátriques y departamentos del hospital y ye referencia pal tratamientu de tumores infantiles de tola comunidá.

Amás, cumple los encamientos de la Estratexa en cáncer nel Sistema Nacional de Salú y favorez una comunicación constante y fluyida con unidaes de referencia del Estáu, a les que s'unvien pacientes pa ciruxíes complexes o tumores que riquen un tratamientu local bien específicu.

El desenvolvimientu del programa de tresplante hematopoyéticu nel HUCA, qu'anguaño inclúi a neños menores de cualquier edá, evitó'l desplazamientu d'estos enfermos y les sos families a hospitales d'otres comunidaes, cola consiguiente comodidá y garantizando una asistencia de la más alta calidá.