El centru neurolóxicu de Llangréu va entamar a funcionar ente mayu y xunu

Va entamar cola puesta en marcha de 30 places coles que va cuntar el centru de día

El Centru pa Persones con Discapacidaes Neurolóxiques de Llangréu va entamar a funcionar ente mayu y xunu cola puesta en marcha de les 30 places con que va cuntar el centru de día y al que, darréu, siguirán les 60 places residenciales con que va cuntar esti centru de referencia estatal (CRE).

Esti equipamientu va prestar servicios d'intervención directa y atención especializada a nivel nacional y va impulsar y va espublizar bones práctiques nesti ámbitu, según prevé’l protocolu de collaboración que van roblar el Principáu y el Ministeriu de Sanidá nos próximos díes.

La conseyera de Servicios y Derechos Sociales, Pilar Varela, avanzó los términos d'esi conveniu qu'esti miércoles autorizó'l Conseyu de Gobiernu, axuntáu güei so la presidencia del conseyeru, Guillermo Martínez, que fai de presidente en funciones al siguir Javier Fernández recuperándose de la intervención de desprendimientu de retina a la que foi sometíu.

Varela anunció tamién que la directora d'esti CRE, María Teresa Gutiérrez, va tener nos próximos díes l’equipu directivu que va poner en marcha esti equipamientu a finales de primavera o primeros de branu, según se plantegó na comisión de siguimientu que tuvo llugar el pasáu 28 de febreru.