Estrelles de la cocina asturiana en Madrid Fusión

Seis cocineros con estrella Michelín presenten el Principáu como destín gastronómicu

Seis de los ocho cocineros asturianos con estrella Michelín participaron güei nel taller "Cocinando nel paraísu: productos d’Asturies a doce manes" col que’l Principáu amosó en Madrid Fusión los atractivos de la rexón como destín gastronómicu.

Nel actu José Álvarez Almeida, Nacho Manzano (Casa Marcial), Ricardo Sotres (El Retiro), Jaime Uz (Arbidel), José Antonio Campoviejo (El Corral del Indianu), Marcos Morán (Casa Gerardo) y Isaac Loya (El Balneario de Salinas) amosaron cómo facer platos d’alta cocina con productos asturianos como'l quesu, el gochu asturcelta o’l virréi.

Ye la primer acción de les previstes en 2018 pa promocionar Asturies dientro d’esti segmentu, unu de los nueve productos recoyíos nel Programa de Turismu Caltenible 2020 y cuntó tamién cola asistencia del director xeneral de Comerciu y Turismu, Julio González Zapico, y del presidente de l’Asociación d’Hostelería y Turismu n’Asturies (Otea).

A la participación nesta feria sumaránse la creación d’un gastromapa, una campaña especializada en medios y redes sociales, la captación de prescriptores y influenciadores del segmentu foodie (amantes de la gastronomía), la meyora de la profesionalización nes visites turístiques a centros de producción agroalimentaria y el sofitu a la celebración d’eventos gastronómicos.

"Queremos amosar la bondá d’una gastronomía afitada dafechu al tarrén, na qu’unes manes espertes son capaces de sacar tol potencial de la nuestra materia prima pa convertila nuna obra d’arte, ensin perder la esencia asturiana. Siempre fieles al productu y a la naturaleza asturiana", señaló González Zapico.

Asturies ta presente per primer vegada en Madrid Fusión con un stand dedicáu a los Alimentos del Paraísu y delles imáxenes de la campaña institucional "Vuelve al Paraísu" presiden ponencies y talleres impartíos por chefs asturianos.

El certame sirvió tamién pa presentar la nueva publicación oficial de turismu gastronómicu, qu’amás de poner en valor los productos asturianos, ufierta esperiencies al rodiu del so procesu d’ellaboración y inxerta’l calendariu d’eventos.

El Principáu ye’l tercer destín nacional n’imaxen gastronómica, según el II Estudiu de la demanda de turismu gastronómicu n’España fechu pola consultora Dinamiza, con una puntuación de 3,71 sobre 4.