La demora duplícase en dellos centros de salú pola fuelga n'Urxencies

Segunda xornada de fuelga de médicos y enfermeros del SAC

Segunda xornada de fuelga de médicos y enfermeros del SAC, el Serviciu d'Atención Continuada d'Urxencies n'Atención Primaria.

El Centru de Salú El Llano, en Xixón, ye unu de los centros de mayor carga asistencial d'Asturies. Esta mañana, la espera pa una consulta yera de dos hores, una más qu'un sábadu habitual. Dos médicos y tres enfermeros atienden güei les consultes y les cases; son dos profesionales menos que davezu en sábadu.

Los 240 médicos y enfermeros del Serviciu d'Atención Continuada , el SAC, denuncien con esta fuelga la discriminación llaboral y salarial que sufren al respective de los sos compañeros de SUAP y Samu, los otros dos servicios d'urxencies estrahospitalaries.

Nos centros tán informndo a los pacientes de los motivos de fuelga, que ta prevista, hasta les 8:00 hores de la mañana del llunes.

N'Uviéu, los trabayadores del SAC salieron n'asamblea a les puertes d'Urxencies de La Ería. Amuesen la so esmolición pol desconocimientu sobro los sos motivos pa dir a la fuelga.

Denuncien les maneres de Sanidá, que tenía una xunta convocada pa esta selmana y sigue ensin celebrase y critiquen los servicios mínimos impuestos. Van siguir, anuncien, con más movilizaciones.

Pela so parte, el conseyeru de Sanidá, Francisco del Busto recuerda que la negociación sigue abierta con tolos sindicatos. Del Busto repite la voluntá d'alcuerdu y de caltener el meyor clima llaboral posible, pero incide en que nun ye una mera xuba salarial.