Los trabayadores d'Alcoa, más xuníos nes sos protestes

Anuncien una xornada de fuelga pal miércoles 19 d'avientu

Representantes de los comités d'empresa de les plantes d'Avilés y A Coruña de la multinacional Alcoa xuntáronse esta mañana n'A Veiga. Nesti llugar que simboliza la xunión entrambes les dos comunidaes anunciaron una xornada de fuelga pal próximu día 19.

Convoquen pa esti día a tolos trabayadores pa que faigan una marcha ente Asturies y Galicia cola que quieren afitar que caminen xuntos esta llucha escontra'l cierre de les factoríes.

El Puente Príncipe Alfonso d'A Veiga, nexu de xuntura ente Asturies y Galicia foi'l llugar escoyíu polos comités d'empresa de les plantes d'Avilés y A Coruña p'anunciar el próximu movimientu.

Ta previsto qu'a les 10:00 de la mañana del día 19, cola actividá d'Alcoa en paru, los trabayadores de la planta d'Avilés entamen una marcha dende Castropol. A la mesma hora, emplegaos d'A Coruña y San Ciprián saldrán dende Ribadeo p'atopase toos frente al ayuntamientu d'A Veiga. Un llugar simbólicu que, dicen, amuesa la xuntura qu'hai ente los cientos de trabaydores que se ven afectaos pol anunciu del cierre d'Alcoa.

Dende dambos comités animen a los trabayadores a participar tanto na fuelga como na concentración y inviten a la planta de San Ciprián a xunise a la causa qu'aseguren non solo afecta a les plantes sobre les que pesa la solombra del cierre. Ta en xuegu, dicen, el futuru de la industria en dambes comunidaes autónomes.

Los representantes de los trabayadores pronunciáronse sobre les midíes anunciaes ayeri pol Gobiernu. Consideren que la situación de les factoríes ye crítica y nun pue esperar a que se tomen midíes nel plazu de seis meses.