Uviéu destaca pola so seguridá ente los turistes, según una encuesta a estranxeros y españoles

Los visitantes tamién destaquen la gastronomía, hospitalidá y caltenimientu del patrimoniu

Según la encuesta fecha a más de 10.300 turistes españoles y estranxeros pa conocer el so preste, Uviéu destaca especialmente por seguridá, con 83 puntos de 100. Una sensación que reconocen los asturianos que viven fuera.

Los turistes tamién destaquen la ufierta gastronómica de la capital del Principáu. Con propuestes como 'los bocaos del Cofrade', los yá típicos pinchos de Selmana Santa qu'estos díes puen tastiase nos restauranes uvieínos, y tola cocina asturiana.

Otru aspeutu valoráu por quien pasó polo menos una nueche na ciudá ye la hospitalidá.

Amás l'estudiu valoró aspeutos como'l tresporte públicu, la vida nocherniega, les compres, el nivel de precios y la ufierta cultural. Nesti aspeutu, los turistes destaquen el caltenimientu del patrimoniu d'Uviéu.

Poro, y a pesar de la lluvia, destaquen Uviéu y Asturies como un destín atractivu pa Selmana Santa.