Unanimidá na Xunta a favor de la I+D+i pa cambiar el sistema productivu

Apuesten por un pactu asturianu pola investigación y la innovación

Tolos partíos políticos con representación na Xunta Xeneral xuntáronse al manifiestu impulsáu por Innovasturias qu'urxe apostar pola I+D+i pa facer frente a la "urxente, imprescindible y inaplazable" necesidá de cambiar el sistema productivu asturianu, reinventase y buscar un futuru pa les xeneraciones vinientes.

El documentu, presentáu esti miércoles nel parlamentu asturianu, espresa'l "convencimientu" de que'l cambéu "namás se va consiguir al traviés d'un apueste decidíu pola investigación y la innovación como un motor únicu pal cambéu".

Pa ello propón facer un pactu asturianu pola investigación y la innovación pa que tolos partíos políticos, sindicatos, organizaciones empresariales y educatives, entidaes públiques y privaes se comprometan a dar pasos pa qu'en menos de diez años Asturies destine polo menos el 3% del PIB a inversión n'I+D+i.