Tecnoloxía y bioinformática pa conocer más el cáncer

Dos empreses asitiaes nel Viveru de Ciencies de la Salú desendolquen productos y servicios pioneros

Detectar un cáncer de próstata nuna sola prueba, de forma rápida, indolora y ensin les molesties que causa nel paciente la visita al urólogu. Esto ye lo qu'ufierta la tecnoloxía na que trabaya la empresa Healthsens, asitiada nel Vivarium d'Uviéu.

Un sensor que mide los marcadores de la enfermedá y que, asitiáu en cualquier Centru de Salú, dexaría facer cribaos poblacionales que detectaren con más tiempu la patoloxía.

El productu ta en fase de desendolcu y podría tar nel mercáu dientro de dos años. Con él, evitaríase amás el sobretratamientu.

La bioinformática ye la ferramienta qu'usa otru grupu de profesionales, Dreamgenics, p'analizar el xenoma humanu. El so estudiu en pacientes con cáncer, comparáu colos de persones sanes, dexa sacar información sobre les causes que producen la enfermedá. Investigación yá al algame de los profesionales sanitarios.

Dos equipos de trabayu venceyaos a la Universidá d'Uviéu y al HUCA, exemplu del talentu asturianu al serviciu de la llucha escontra'l cáncer.