'La naturaleza en el aula', un llibru pa una educación sostenible

Les maestres Claudia López y Patricia Muiña proponen actividaes venceyaes con recursos naturales

La Universidá d’Uviéu xunió, va12 años, a una gallega y a una asturiana cuando se formaben pal mundu de la docencia. Güei son maestres , Claudia López en Navia y Patricia Muiña nel pueblu gallegu de Barreiros.

Foi nel confinamientu cuando decidieron poner de la so parte y intentar ayudar al traviés de les redes sociales a toos esos padres y madres que nun sabíen qué facer colos sos fíos.

Una editorial fixóse nelles, nos sos conseyos y propunxéron-yos escribir un llibru, qu’acaba d’asoleyase, 'La naturaleza en el aula'. Ta dirixíu a profesores, maestros y families, trata de fomentar la rellación de los más pequeños cola naturaleza. Amuesa más de 50 actividaes, vezos o práctiques feches con recursos naturales.

Daqué qu’amuesa que pa la educación de calidá nun fai falta un gran desembolsu económicu. Munchos recursos podemos alcontralos en playes o viesques.

Xugar y deprender al empar, ye la filosofía d’estes dos amigues que, a pesar de vivir en dos comunidaes distintes, pudieron sacar el tiempu necesariu p’algamar la so primer creación lliteraria.

Pero, a pesar d’ello, cumplieron el so deséu de poner el so pequeñu granu d’arena neso d’educar, nuna educación, eso sí, sostenible.