Corderos xaldos p’apadrinar en Les Regueres

Judith Naves revoluciona'l negociu familiar cola campaña 'Apadrina un corderu, y cómilu en Navidá'

Judith Naves ye una moza empresaria de 26 años que revolucionó'l negociu familiar, sobre manera, en Navidá. Cría animales de les races autóctones asturianes en Les Regueres y dende va ocho años, trabaya cola campaña 'Apadrina un corderu, y cómilu en Navidá'.

Ufierta a los sos veceros escoyer una de les races autóctones asturianes que cría nos sos praos. Estos apadrinen unu d'ellos, pagando una cuota mensual. Tamién pue pagase tol preciu nestes feches.

Un corderu xaldu cocináu cuesta 135 euros pa 16 persones, el pitu caleya, 80 euros para cuatro comensales, y el gochu asturcelta 80 euros pa 10 persones. Cada vez tien más demanda y reparte per toa Asturies.

L'añu pasáu, ente Nuechebona y Nuechevieya sirvió los sos guisos a 150 families, unes 1.200 raciones. Productos que cada vez-y piden más, y por eso tamién vende carne en conserva en tiendes Gourmet. Estos díes dobla la so producción habitual polos pidíos de les cestes de Navidá.