Hunosa entama les obres que dexarán que la calefacción per xeotermia llegue a Llangréu

La empresa Tilia fadrá un estudiu de les meyores práctiques europees en redes urbanes de calor y fríu

La empresa alemana Tilia, que visitó les instalaciones de xeotermia del pozu Barredo en Mieres, recibió l’encargu de la Comisión Europea de facer un estudiu de les meyores práctiques europees en redes urbanes de calor y fríu, sobre manera les basaes n’enerxía anovable.

L’últimu oxetivu ye determinar les posibilidaes de que s’aplique n’otros países. El resultáu recoyeráse nuna publicación europea pa finales d’añu.

Nel marcu d’esta visita, el grupu Hunosa confirmó qu’entamen esta selmana en Sama les obres de remocique del pozu Fondón pa poder ufiertar calefacción vía xeotermia en Llangréu nel primer cuatrimestre de 2021.

Per otru llau la compañía confirmó tamién qu’en Mieres, dempués del branu, tará yá operativa la calefacción per xeotermia nel edificiu científico-tecnolóxicu del campus universitariu, nel Institutu d’Educación Secundaria Bernaldo de Quirós y en 248 viviendes del centru urbanu, dientro de la segunda fase del proyectu.