Un camioneru asturianu va recibir el 15% de la compra del so vehículu

Mediu millar de reclamaciones pendientes pol cártel de venta de camiones

Primer sentencia n'Asturies pol cártel de venta de camiones condergáu pola Comisión Europea por apautar sobrepecios. Daimler-Mercedes Benz tendrá que pagar el 15% del importe de la compra del vehículu a un camioneru asturianu. Nel Principáu, hai pendientes mediu millar de reclamaciones, que -de siguir per esta llinia- podríen suponer un reembolsu d'unos 10.000 euros per vehículu.

La compañía alemana Daimler-Mercedes Benz va tener que reembolsar el 15% de la compra d'un camión a un tresportista asturianu. Ye la primer sentencia del cártel de camiones que se pon n'Asturies.

El xulgáu de lo mercantil 2 estima que'l fabricante alemán fizo medrar el preciu compincháu con otros fabricantes europeos y cobró un 15% de más pol preciu del vehículu. Amás va tener que pagar los intereses dende'l momentu de la demanda.

La sentencia ye importante, porque n'Asturies hai pendientes mediu millar más de reclamaciones, correspondientes a camiones mercaos ente 1998 y 2011. Esto significa que pa unos vehículos que daquella costaron unos 80.000 euros de media, les devoluciones superen los 10.000 euros, de siguir con esta interpretación. Esto podría llegar a sumar unos cinco millones d'euros de devolución a los tresportistes asturianos.