Asturies súmase a les concentraciones de sofitu a Juana Rivas

Los participantes reclamen xusticia y protección pa los menores

Asturies sumóse güei a les concentraciones que se ficieron al empar en dellos puntos del país en sofitu a Juana Rivas.

Xusticia pa Juana y los dos fíos ye lo que reclamó quien participó na manifestación d'Uviéu ante los xulgaos. Creen que los neños son víctimes d'un mal funcionamientu de la Xusticia.

Juana ta en paraderu desconocíu desque hai dos selmanes incumplió la orde d'entregar a los fíos al padre que vive n'Italia y qu'en 2009 foi condenáu por violencia de xéneru.

Los abogaos de la granadina presentaron el xueves un segundu recursu d'amparu ante'l Tribunal Constitucional pa que suspenda la orde que pesa sobre ella pidiendo qu'entregue a los menores.

Les concentraciones fueron convocaes por plataformes ciudadanes como 7N. La d'Uviéu nun foi la única que se celebró n'Asturies yá que la reivindicación tamién se repitió en Xixón.

Precisamente, Juana Rivas mandó güei una carta a les plataformes que se concentraron pa sofitala, na que diz que ta fuxida, pero que nun ta faciendo nada fuera de la llei.