Belén Álvarez Ceballos personaliza 'clicks' de playmobil

Los coleccionistes, aficionaos y families con neños son los sos principales veceros

Belén Álvarez Ceballos ye una d'eses persones apasionaes pol famosu 'click' de playmobil dende neña. La so pasión por esti popular xuguete llevóla a formar parte del coleicionismu d'estos moñecos de les 1.000 formes y colores col pasu de los años, pero la so vida profesional siempre tuvo amestada a la industria farmacéutica.

Nel 2013, dexó'l so oficiu poles remortines d'un grave accidente de tráficu y foi entós cuando decidió dedicase profesionalmente al negociu de los playmobils.

Va seis años decidió entamar esti tipu de negociu creando 'clicks' personalizaos de forma artesanal, dempués de trabayar namás pa coleccionistes. Ye un complementu salarial a la so pensión, yá que son mui poques les persones que viven d'estos moñecos.

Les sos creaciones artesanales véndeles ente los 10 y los 15 euros por pieza, algamando los 20 euros les más trabayoses.

Los 'clicks' personalizaos de llanisca y porruanu son les pieces más demandes pola so vecería, pero tamién tienen munchu tirón los d'Harry Potter, los de Frida Kahlo o los de los superhéroes.

Na pandemia, el negociu de los 'clicks' tamién se paralizó, pero esta nueva entamadora dedicóse a faer stock y a ellaborar creaciones con nueves temátiques pa salir de la crisis lo enantes posible.

Belén vende estos moñecos, principalmente, nes feries especializaes d'esti popular xuguete, pero tamién atienden pidíos peles redes sociales, pelos mercadinos y peles tiendes de xuguetes, de coleccionistes y de llambionaes.

Unu de los sos oxetivos ye'l d'entamar una feria de playmobil nel conceyu llaniscu, como la que se celebra davezu en La Pola (Siero) pel mes d'abril, pa poner el so granín d'arena nesto de la desestacionalización turística.

Belén ye, amás, la presidenta actual de l'Asociación de Comerciantes de Posada.