Radiotelevisión del Principáu d'Asturies Radiotelevisión del Principado de Asturias
Radiotelevisión del Principado de Asturias
Fuente: RTPA, 29 de setiembre. 2018 20:42

Carmen Moriyón, nueva presidenta de Foro

Afitada por 315 votos a favor, tres en blanco y unu nulu

La nueva presidenta de Foro, Carmen Moriyón, ufiertó, dempués de ser escoyida pal cargu, el so esfuerzu pa liderar un proyectu de cambéu "realizable, tanxible y eficaz" qu’afronte los retos d’Asturies en temes como la transición enerxética, el cambéu de modelu económicu, el problema demográficu y la financiación autonómica.

Moriyón foi afitada por 315 votos a favor, 3 en blanco y unu nulu, nel III Congresu que se celebró en La Pola (Siero) y aseguró qu’Asturies ta anguaño "al ralentí" y que Foro quier camudar esta situación porque ye un partíu que nació "con vocación de gobiernu" que ganará les autonómiques de 2019.

La so intervención foi interrumpida delles vegaes poles ovaciones zarraes de los asistentes al tercer congresu del partíu que se celebró en La Pola (Siero) y onde foi escoyida la nueva Comisión Directiva.

Nel so nuevu equipu, compuestu por 30 vocales, figura como vicepresidente, un cargu de nueva creación pa facer un llabor d’asesoría de la presidenta, l’hasta anguaño secretariu xeneral, Francisco Álvarez Cascos, que sedrá sustituyíu pol conceyal de Llaviana Adrián Pumares

Frente a "proyectos agotaos", Moriyón afirmó que Foro sal a ganar ufiertando "diálogu saludable" y alcuerdos, porque asume que "el tiempu de los gobiernos en solitario y en mayoría terminó, probablemente pa siempres".

Esplicó que la rexón ta siendo superada frente a les demás comunidaes autónomes en medría demográfica, trabayu y población activo, infraestructures, calidá n’enseñanza y sanidá, ufierta cultural, medría económica, creación d’empreses, o emprendimientu.

Afondó en qu’hai que recuperar la credibilidá perdida polos políticos y el partíu preséntase como l’alternativa con un proyectu que nun vaya escontra naide, sinón con Asturies.

"Nós nun somos una sucursal", solliñó Moriyón qu’insistió en que Foro defenderá en financiación autonómica un repartu equitativu, afitáu na población de cada comunidá y les sos particularidaes, atendiendo a les necesidaes reales y non a afinidaes polítiques o ánimos de moderación.

La nueva presidenta apostó por una financiación autonómica "meyor calculada, meyor tresferida y meyor executada".

Censuró la falta de concreción nes inversiones comprometíes y los plazos previstos d’entrada en serviciu de les llinies del AVE y manifestó que se necesita un gobiernu que "plante cara énte les consecuencies d’unos planes de descarbonización" a los que nin siquiera se pue llamar planes, porque consisten namái, a xuiciu de so, en "vacilaciones, inseguridaes y tatexamientos".

Moriyón definió al so partíu como reformista, de centru y con vocación europea y solliñó que nun quier ser "nin más, nin menos que naide".

Los estatutos recueyen espresamente que la presidencia de Foro lleva apareyada la candidatura a la presidencia del Principáu y Moriyón, al frente de l’Alcaldía de Xixón dende 2011, nun pue repetir como candidata a les municipales de 2019 porque los estatutos impiden a los sos cargos tar más de 8 años nel mesmu puestu.

La nueva presidenta de Foro sustituirá asina al frente d’esta formación a Pedro Leal -nomáu pal cargu’l pasáu mes de xunu dempués la dimisión de l’anterior presidenta, Cristina Coto- y que siguirá na Comisión Directiva como vicesecretariu de Coordinación.

© 2019 Radiotelevisión del Principado de Asturias | Todos los derechos reservados

Publicidad | Aviso Legal | Política de privacidad | Cookies | RSS | Sobre RTPA | Entidad adherida a AUTOCONTROL

Aviso de cookies

Usamos cookies propias y de terceros para ofrecer una mejor experiencia y mostrarle publicidad relacionada con sus preferencias. Al navegar o utilizar nuestros servicios el usuario acepta el uso que hacemos de las cookies.

Pinche aquí para más información Entendido