El Llar, calificáu Bib Gourmand pola Guía Michelín, nel so 23 aniversariu

Viri Fernández prepara la Meyor Fabada del Mundu, premiada con esta distinción en 2013

Viri prendió los fogones del Llar en 1996. Necesitaba dar un golpe de timón a la so vida, reconvertise. Y fízolo na casa familiar de San Román faciendo una de les coses que meyor se-y daben: cocinar.

Afirma que ye la consecuencia d'un padre al que-y gustaba comer poco y bien fecho, y d'una madre a la que nun-y gustaba cocinar. Y recuerda, vivamente, el primer platu que preparó.

Fiel defensora de cocinar colos ingredientes de proximidá, considera que na nuesa rexón abonden perbonos productos pa llevar a la mesa.

En 2013, la fabada de Viri foi premiada como la meyor del mundu. Un premiu que llegó xusto nel momentu necesariu.

Amás, el Llar foi calificáu, anguaño, como establecimientu Bib Gourmand pola Guía Michelín. Son reconocencies que Viri esfruta col so fíu y la so nuera, con quien yá trabaya nesta casa de comíes, y los que van heredar el negociu.

Una filosofía que se basa na cocina de tola vida con sutiles toques vanguardistes. Ésta ye la receta pa que'l Llar cumpliera 23 años.