Los pescadores critiquen los problemes de caláu nos cais de Llanes y Llastres

Los inscritos na Seguridá Social menguaron n'Asturies un 30% dende 2010

Los presidentes de les dos cofradíes más importantes del Oriente asturianu, les de Llanes y Llastres, que'l pasáu añu facturaron 1.396.000 euros nesta mesma campaña, ente un 40 y un 50% del total del añu, encaren los díes previos a la costera de la xarda con una mesma reivindicación: los graves problemes de caláu que sufren dambos cais.

Por ello, piden que se draguen urxentemente. A esta problemática, xúnese'l so malestar pola cuota axudicada frente a Euskadi o Cantabria.

Na zona oriental, sedrán mui pocos barcos los que podríen salir a faenar mañana si'l tiempu lo permite: namái tres cerqueros con base en Llastres. El restu d'embarcaciones, d'artes menores, unes 38 en tola comarca, tán entá pendientes d'unos últimos trámites.
Entame o non, nes cofradíes de Llastres y de Llanes nun tán pa nada d'alcuerdu col repartu de cuotes.

Más allá de la importancia económica que pa dambes cofradíes del oriente supondrá la costera de la xarda, los sos responsables tienen mui claro que lo más urxente ye iguar los problemes de caláu que tienen nestos momentos los cais de Llastres y de Llanes, y que exixen encarar yá llabores de dragáu.

Los profesionales de la pesca de la comarca oriental tienen claro que la costera de la xarda nun echará a andar, realmente hasta, polo menos, la segunda selmana de marzu.

Los inscritos na Seguridá Social menguaron n'Asturies un 30% dende 2010

Na última década, el númberu de pescadores n'Asturies inscritos na Seguridá Social menguó un 30%.

La caída afecta sobre manera a los pescadores por cuenta ayena. Güei son 400 menos.

Les poques ganancies tán na base del problema. Cuatro barcos n'Asturies nun puen salir a faenar por falta de tripulación.

Un barcu lleva amarráu en Bustiu, desque acabó la costera del bonitu, a finales d'agostu, porque nun atopa tripulación, cinco marineros.

Por eso, el patrón decidió vender la embarcación. Detrás ta que ye un trabayu sacrificáu y que los sueldos nun son mui altos poles baxes ganancias nel sector.

Hai otros cuatro barcos afectaos, amarraos en Llanes, Bustiu y Veiga.

El sector critica amás la falta de cursos de formación específicos y adecuaos n'Asturies que favorezan l'apaición de nueves xeneraciones de pescadores.