Hunosa promociona la herencia cultural de la minería asturiana

El conveniu reivindica'l papel de la minería nes cuenques

La empresa Hunosa robló esti martes el primeru d’una serie d’alcuerdos con entidaes culturales pa promocionar la herencia cultural y el patrimoniu industrial de la minería n’Asturies.

La compañía robló con Espacio Cultural 19 10, de Mieres, un conveniu pa dar a conocer la memoria de la minería de carbón n’actividaes a comuña que tienen el propósitu de reivindicar el papel que desempeñó esta actividá nes cuenques.

Esti alcuerdu ye’l primeru d’una serie con otres entidaes locales, rexonales y estatales que refuercen el “compromisu” d’Hunosa col patrimoniu industrial y la cultura minera, afirmó’l presidente de la empresa, Enrique Fernández, nel actu de la robla celebráu na Feria Internacional de Muestres d’Asturies.

La directora d’Espacio Cultural 19 10, Greta Cortina, valoró la importancia del alcuerdu como un elementu que dexará poner en valir “un recursu que tien que ser esplotáu” dientro de la ufierta turística d’Asturies.

Hunosa y la entidá cultural mierense desendolcarán a comuña esposiciones, conferencies, cursos, congresos, sesiones d’estudiu y investigación y la edición de publicaciones.

Estes actividaes prestarán “especial atención a la igualdá ente homes y muyeres y la perspectiva de xéneru”, destacó’l presidente d’Hunosa.

“La compañía avanza hacia un horizonte verde centrada na nueva enerxía, pero al empar asume‘l compromisu de caltener la memoria del carbón”, dixo Fernández.