La Universidá y ArcelorMittal anueven la so collaboración pa la descarbonización

La cátedra investiga tecnoloxíes llimpies, eficiencia enerxética y integración de práctiques ambientales

La Universidá d'Uviéu y ArcelorMittal anovaron esti xueves la so collaboración p’avanzar hacia la descarbonización y una industria sostenible al traviés d'una cátedra pa investigar n'árees rellacionaes coles tecnoloxíes llimpies, la eficiencia enerxética y la integración de práctiques ambientales.

El rector de la Universidá d'Uviéu, Ignacio Villaverde, robló n'Avilés el conveniu cola compañía siderúrxica, que va tener una vixencia de cuatro años y va cuntar con un financiamientu total de 160.000 euros.

Villaverde amosó'l so contentu pola disposición d’ArcelorMittal a intensificar la so rellación cola Universidá y destacó’l compromisu de la institución académica cola tresferencia de conocencia.

L'alcuerdu ente la Universidá y la empresa inclúi dellos ámbitos d'actuación ente los que destaca la investigación p’avanzar na descarbonización y na transición hacia una industria sostenible na producción d'aceru.