Industria trabaya "en posibles soluciones alternatives" al proyectu d'ArcelorMittal

Roqueñí cree que'l futuru de la siderurxa integral n'Asturies nun pue depender de la decisión d'una multinacional

El Ministeriu d’Industria, xunto al Gobiernu del Principáu, ta "trabayando en posibles soluciones alternatives" pa caltener n’Asturies el ciclu integral del aceru en casu de qu’ArcelorMittal nun confirme la execución del proyectu de descarbonización cola construcción d’una planta de mengua directa de mineral de fierro (DRI).

Asina lo dixo esti martes la conseyera de Transición Ecolóxica, Industria y Desendolcu Económicu, Nieves Roqueñí, nel plenu de la Xunta Xeneral del Principáu en rempuesta a una entruga fecha pol diputáu de Foro Adrián Pumares.

Roqueñí solliñó que "la primer opción" ye qu’ArcelorMittal, que yá entamó la construcción del fornu híbridu d’arcu eléctricu en Xixón, confirme’l so proyectu pa la execución de la planta de mengua directa de mineral de fierro, una iniciativa pa la que tien a la so disposición una subvención estatal de 450 millones d’euros.

En casu de que la multinacional siderúrxica "nun confirme" el so proyectu podría ser "otru operador cualificáu" el que lu ficiere teniendo en cuenta "esi calter estratéxicu de la siderurxa integral" que reconocen tanto’l Gobiernu central como l’asturianu, apuntó Roqueñí, que recordó que l’únicu ciclu integral del aceru qu’hai n’España ye’l d’Asturies y que’l mantenimientu d’esti tipu d’actividá n’Europa pasa pola descarbonización de los procesos.