La princesa Leonor recibe'l títulu d'alcaldesa honoraria d'Uviéu

La princesa protagoniza'l so primer actu n'Asturies ensin la presencia de sos padres

La princesa Leonor de Borbón recibió esti xueves el títulu d'alcaldesa honoraria d'Uviéu por cuenta de la so mayoría d'edá, una distinción que-y foi apurrida poco primero de recoyer la Medaya d'Asturies.

Doña Leonor sigue asina los pasos de so padre, el rei Felipe VI, qu'en 1988 foi reconocíu con esti mesmu títulu pol consistoriu de la capital asturiana y que dos años enantes recibió tamién la máxima distinción del Principáu.

La princesa protagonizó'l so primer actu n'Asturies ensin la presencia de sos padres, los reis, pa recibir la reconocencia na casa consistorial de la capital del Principáu. A les sos puertes, y al son de les gaites, decenes de persones aclamáronla.

Énte numberoses autoridaes, como'l ministru de Política Territorial y Memoria Democrática, Ángel Víctor Torres, y el xefe l'Executivu asturianu, Adrián Barbón, el rexidor d'Uviéu, Alfredo Canteli, apurrió a la princesa'l medallón y la insinia corporativa y el cayáu de mandu municipal, atributos que la acreiten como alcaldesa honoraria de la capital del Principáu pola so vinculación familiar y institucional cola ciudáu y el compromisu que manifestó con Uviéu y el Principáu.

En posando sonriente nel salón de Plenos colos representantes políticos, doña Leonor foi al despachu del alcalde pa roblar nel llibru d'honor del Conceyu y visualizó nel hall del edificiu consistorial la placa conmemorativa d'esti títulu, asitiada frente a la del rei Felipe VI.