El plenu d'Uviéu aprueba los presupuestos pa 2025 col sofitu de PP y IX

Les cuentes contemplen la mayor partida pa polítiques sociales "de la hestoria"

El plenu del Conceyu d'Uviéu aprobó esti xueves los presupuestos municipales pa 2025, que xuben a 270.850.000 euros, col votu favoratible de los catorce conceyales del PP y los tres d'IX, l'abstención de la conceyala non adscrita Elena Figaredo y la oposición del PSOE y Vox.

El sofitu d'IX diose tres una negociación na que'l PP comprometióse a asumir compromisos en materia de polítiques sociales cola formación, ente los que'l más destacable ye la cesión de terrenos municipales al Principáu pa la construcción de 300 viviendes públiques, recoyíu nuna propuesta de la formación d'izquierdes que tamién salió alantre na sesión plenaria colos votos a favor del PP y de Figaredo y la oposición de PSOE y Vox.

Na presentación de les cuentes, que suponen una medría del 4,7 por cientu más que les d'anguaño, la conceyala d'Economía, Leticia González, defendió que colos presupuestos de 2025, los segundos más altos de la hestoria del conceyu, l'equipu de Gobiernu vuelve demostrar la so “fiabilidá” pa cumplir les sos promeses.

Según afirmó, estos presupuestos van dexar a Uviéu siguir siendo "el motor económicu y social" d'Asturies, y la ciudá "más llimpia" d'España, siguir batiendo records turísticos, ufiertar la "meyor" ufierta cultural de les grandes ciudaes d'Europa, cuntar con unos servicios públicos "de calidá" y infraestructures y equipamientos municipales y deportivos “del sieglu XXI".

Los presupuestos tamién recueyen actuaciones prioritaries como la firma del conveniu de La Vega y la compra de la galería comercial del Palaciu de Congresos.