El programa Coeducastur impulsa la educación n'igualdá en 50 centros de Primaria

La tasa d'alumnáu que finaliza la ESO estáncase anque baxen les repeticiones de cursu

El Gobiernu d’Asturies reivindicó esti martes el lideralgu del Principáu en polítiques d’igualdá, a les qu’amiesta un nuevu impulsu pa construyir una sociedá más igualitaria dende les edaes más tempranes mediante la estensión del programa Coeducastur a 50 centros d’Educación Primaria.

La vicepresidenta del Principáu, Gimena Llamedo, y la conseyera d’Educación, Lydia Espina, presentaron los materiales específicos pal desendolcu d’esta iniciativa, cola que l’Executivu asturianu quier avanzar na prevención de la violencia sexista y combatir la desigualdá dende la escuela.

Con una inversión de cien mil euros esti añu, la formación prevista nel programa daráse de febreru a mayu, y tendrá una duración de 60 hores.

El plazu d’inscripción yá ta abiertu y los materiales tarán disponibles de baldre y online pa que tolos colexos que quieran puean inxertalos a los sos proyectos educativos.

El cursu ta estructuráu en nueve módulos qu’aborden dende los conceptos básicos de coeducación hasta’l so inxerimientu en competencies clave (llingüística, dixital, matemática o ciudadana, ente otres).

Los centros que finalicen esta formación podrán optar a ayudes de mil euros pa desendolcar proyectos propios, que tendrán qu’inxerise nel cursu 2025-2026.

La tasa d’alumnáu que finaliza la ESO estáncase anque baxen les repeticiones de cursu

Cuatro de cada cinco estudiantes de la ESO algamen finalizar esti ciclu educativu, una tasa que malapenes camuda dende va seis años. Lo que sí mengua ye’l númberu d’alumnos y alumnes que repiten cursu, una midida escepcional, según la última llei educativa. Namás el 7% del alumnáu repite, anque n’Asturies la cifra ye más baxa, namás hai un cinco por cientu de repetidores.

Ente los motivos pa xustificar los abandonos, tán la falta de motivación y que munchos de los alumnos y alumnes lleguen a 4 de la ESO con déficit de competencies d’enantes, lo que-yos torga completar el ciclu.