El Cai d'Avilés estrena una grúa móvil d'última xeneración

Está destinada a la carga y descarga de productos siderúrxicos

L’operador loxísticu Algeposa estrenó nel Cai d’Avilés una grúa móvil d’última xeneración, destinada a la carga y descarga de productos siderúrxicos, que dexará dar un serviciu de mayor calidá y más sostenible a les empreses del cai avilesín.

Ente les sos ventayes, destaquen la eficiencia enerxética, la mengua de contaminación acústico y llumínico, y la dixitalización, anque lo más importante ye la seguridá pa los operarios que trabayen con ella. Tien una capacidá máxima de carga de 125 tonelaes, esplica Gregorio Esparza, director técnicu d’Algeposa.

Algeposa ye ún de los principales operadores del Cai d’Avilés, onde da servicios dende l’añu 2005. Ta especializada na estiba y desestiba de productos siderúrxicos, con ArceloMittal como principal veceru. Esta nueva inversión ye una apuesta pola medría de les empreses avilesines coles que trabaya y del mesmu cai, destaca María Luisa Guibert, presidenta d’Algeposa.

Según el presidente de l’autoridá portuaria, Santiago Rodríguez Vega, les bones perspectives de medría del sector eólicu, y de les empreses siderúrxiques d’Avilés, ye lo que ta animando a los operadores loxísticos a invertir y al cai a ampliar la so infraestructura.

En cuantes a les obres de construcción de la futura esplanada de 32.570 metros cuadraos p’actividaes loxístiques na marxe derecha de La Ría d’Avilés, los trabayos avancen a bon ritmu. La previsión ye que les obres acaben nel mes de mayu.