Monchu García va optar a la reelección al mandu de la Agrupación Socialista de Xixón

El plazu de presentación de candidatures va rematar el próximu 19 de marzu

El secretariu xeneral de l'Agrupación Socialista Xixonesa, Monchu García, avanzó la so intención d'optar a la reelección y "siguir trabayando pa faer de Xixón un llugar meyor, xunto a lo meyor d'esta agrupación".

L'agrupación convocó ayeri la XV Asamblea Municipal Estraordinaria Congresual, que va tener llugar los díes 21 y 22 de marzu na Casa'l Pueblu.

"Yo voi optar a la reelección como secretariu xeneral", indicó García poco dempués d'anunciase la convocatoria de l'asamblea del PSOE xixonés al traviés del so perfil nes redes sociales.

El plazu de presentación de candidatures va rematar el próximu 19 de marzu, a les 18:00 y, según el calendariu afitáu, el día 21 de marzu, a partir de les 18:00, va tener llugar la constitución de l'Asamblea y la elección de la mesa, amás del alderique y votación de la xestión de la Comisión Executiva Municipal.

Al otru día, un total de 1.197 afiliaos tán llamaos a votar les candidatures presentaes y van poder faelo nel horariu ente les 11 hores y les 20:00.

Tres esta xornada de votación, van conocese los resultaos de les persones escoyíes pola militancia pa tar al mandu de la Secretaría Xeneral, de la Comisión Executiva y del Comité Autonómicu.

Precisamente esti xueves a les 19:00, na Casa'l Pueblu, un grupu de militantes del PSOE xixonés convocaron una xunta "pa deliberar sobre la posible presentación de candidatures" a la Secretaría Xeneral ante la próxima celebración de l'Asamblea Congresual dientro del procesu de renovación de los órganos de les agrupaciones municipales.