'Mi Casa' ufierta pisos ensin tutelar adaptaos a persones con gran discapacidá intelectual

Una iniciativa pionera que cambia la estratexa de cuidaos pal colectivu

Plena Inclusión va plantegar la próxima selmana a les asociaciones de persones con gran discapacidá intelectual que se sumen al proyectu 'Mi Casa'. Una iniciativa pionera que cambia la estratexa de cuidaos pa esti colectivu. Tuvimos coles inquilines y los profesionales que les sofiten nel primer pisu d'Asturies que ye una alternativa a la institucionalización.

Conocíense d'enantes, pero nunca hasta agora podíen imaxinar que podíen ser compañeres de pisu. Tres una mudanza adulces, María, Noelia y Rosi yá lleven tres meses d'una nueva vida. Habiten esti pisu de manera autónoma cola asistencia personalizada de cuatro profesionales. Tán felices.

La so casa ye la primer esperiencia n'Asturies d'anovación en cuidaos a persones con una gran discapacidá intelectual. Pa Noelia ésti ye'l so pisu de soltera, qu'adulces va faciendo so.

Nun ye un pisu tuteláu. Ye una alternativa a la institucionalización d'estes persones. El Principáu contribúi con 200.000 euros a esti proyectu que recaló en L'Entregu por cuenta de la proactiva Asociación Rey Aurelio.

El proyectu 'Mi Casa' ye un espaciu onde se cultiven los llazos familiares, les amistaes y la relación col vecindariu. Por eso, constrúi amás comunidá, qu'ameyora la calidá de vida d'estes amigues.

Plena Inclusión va abrir la próxima selmana la puerta a más esperiencies como ésta pa que nun seya escepcional.