Ferreru, un oficiu camín del desaniciu pero con relevu a la vista

Cursos de formación que ganen adeptos n'Os Ozcos

La pandemia tamién camudó'l modelu de formación en dellos oficios. Ye'l casu del ferreru. N'Os Oscos recuperaron los cursos de formación d'un trabayu en peligru de desaniciu que nos últimos años ta ganando adeptos.

Clara Fernández ye de Tarragona. So güelu y so bisagüelu yeren ferreros, por eso'l so interés n'afondar nun oficiu que conoció mui de cerca. Quixo viaxar a Os Ozcos pa recibir formación nunu de los pocos mazos que siguen n'activo, el de Mazonovo, en Santalla, y onde esparden conocencies pa evitar la desapaición del arte del fierro.

Cinco alumnos trabayaron duramente tol fin de selmana nuna redolada privilexada, martiellu en mano, modelando'l fierro nel fueu que nesta contorna quieren que siga vivo, y calteniendo toles midíes de distanciamientu y hixene.

Los espacios son pequeños y les ferramientes davezu compártense pero agora la formación esixe cambeos pa evitar riesgos.

Hai menos alumnos nos cursos de formación tres la llegada de la pandemia, pero l'interés pola forxa inda sigue presente.