'Os Reises' d'El Valledor', la tradición más pintoresca d'Allande

La mazcarada tresforma, al entamu l'añu, a vecinos y visitantes

Dende va una década, hai un día al añu nel que'l silenciu d'El Valledor ruémpese pa recibir a la mazcarada de 'Os Reises'.

La tradición recuperóse en 2009 y dende entós, llueva o ñeve, nun faltaron a la cita'l fin de selmana más cerca de la festividá de Reis.

Foi l'asociación Conceyu de Cultura Tradicional Vezos Astures la que s'encargó de recoyer de la tradición oral tola información sobre esta comparsa, que llevaba mediu sieglu ensin facese, y l'Asociación Cultural Amigos de Fonteta tomó dempués el testigu tratando de recrear lo que se facía antiguamente.

Son 11 personaxes en total, dixebraos ente los guapos y los feos, 'os de a roupa boa' y 'os de a roupa ruía'.

Los feos encabecen la comitiva. Al frente siempre 'el choqueiro', que da anuncia de la llegada de 'Os Reises' y ye l'encargáu de protexer la comparsa, pa que naide-yos quite les sos mázcares.

El más traviesu y revoltosu ye 'el rodalo'. Armáu col tradicional preséu que s'usaba pa sacar la brasa del fornu pan, nun dexa d'arrodalar a toos y a tolo que s'alcuentra al so pasu.

Xunto a él 'a cardadoira' que, amás de cardar la llana, preocúpase de despioyar a tolos presentes.

Completen el llistáu de los feos, 'los maragatos'.

Nel grupu de los guapos, 'el militar' y 'el valenciano' y les sos respectives madames, precedíos pol únicu a cara descubierta: 'la gocha’. La so misión, sacu en mano pa recoyer l'aguilandu, ye llegar a les puertes y entrugar si se pue cantar.

Asina percuerren cada añu los pueblos de Vilalaín, Fonteta y San Salvador, contaxando'l so bon humor y entusiasmu a tol que s'atopen pel camín.

Dende'l primer momentu los vecinos volcáronse col proyectu y xunto a ellos l'abondosu públicu que, cada vegada más, llega dende dellos puntos de toa España pa vivir esi día.

Fieles a la cita, 'Os Reises' volverán a percorrer El Valledor el 4 de xineru viniente cantando, baillando y pidiendo l'aguilandu.