'Casa Hermógenes' unu de los negocios con más solera de Ponga

Eva González rexenta'l restaurán nel qu'ufierta, sobre manera, comida casera

Con amplia esperiencia nel sector de la hostelería, onde trabayó como camarera y cocinera, Eva González nun lo pensó dos veces cuando tuvo la oportunidá de poder tar al mandu del so propiu negociu, 'Casa Hermógenes', y enriba en Sellañu, el so pueblu.

A la hora de entamar nun conceyu rural como ye Ponga, cuntó col sofitu del Programa Leader del Oriente d'Asturies.

Eva atopó'l so primer empléu, precisamente na localidá pongueta. Ye una empresa que funcionó cuasi 20 años y que nel so día foi premiada pola Fundación de la Economía Social.

Na so llarga faceta como hostelera, Eva trabayó en conceyos vecinos como Cangues d'Onís. Anque tien ayuda los fines de selmana y branu, cuasi siempres ta sola. La seña d'identidá de la so cocina son los platos de tola vida. El perfil de la so vecería ye mui variáu.

Feliz de poder trabayar nel so pueblu, y como socede n'otres zones de Ponga, lo que peor lleva Eva son los problemes que sufre cola pésima cobertura de la telefonía móvil y la deficiente conexón a Internet.

Como tien arrendáu tol inmueble, al llargu plazu y si les coses van normalizándose, esta entamadora tien más proyectos: abrir una pensión como complementu a 'Casa Hermógenes', y inclusive nuna pequeña tienda.