'La Capacidá de Ser Escepcional', un esitosu programa d'inclusión al traviés del deporte

Un millar d'escolinos asturianos deprenden a ponese na piel de los más vulnerables

L'Asociación Sin Límites, centrada na inclusión por mediu del deporte, desenvuelve con un millar d'escolinos asturianos un programa centráu en xenerar la empatía al traviés d'actividaes físiques onde los alumnos sienten dende'l ser escluyíos d'un grupu, como'l depender d'otru pa movese o ver.

Financiáu pol Fondu Social Européu, esti programa ta teniendo tanta aceptación que concurrirá a la siguiente convocatoria pa poder atender a tolos centros interesaos, el doble d'alumnos d'esta primer edición.

Favorecer la sensibilidá a edaes tempranes sobre los colectivos más vulnerables y ufiertar les ferramientes pa consiguir que los nuesos comportamientos seyan inclusivos. Y too amás al traviés del deporte y poniendo'l focu en quien tien dalgún tipu de necesidá especial a nivel motor o intelectual, pero ensin escaecer a quien emocionalmente sufre dalgún tipu de barrera propia o de la so redolada, como les víctimes d'acosu o abusu.

El deporte ye la ferramienta de trabayu de l'Asociación Sin Límites que, gracies al respaldu de la Conseyería d'Educación y la subvención del Fondu Social Européu, lleven meses trabayando con un millar d'alumnos d'ente los 10 y 15 años d'ocho colexos asturianos.

Los resultaos falen por sí mesmos. Ponese na piel del otru, resulta esitosu a la hora de xenerar empatía y revertir comportamientos.

Ye la enseñanza del programa de refuerzu escolar 'La Capacidá de Ser Escepcional', una cualidá que concede l'aceptar la diferencia y incluyir la diversidá.