'Una historia popular del fútbol', l'ensayu sociolóxicu de Mickael Correia

El so autor desplica cómo al traviés d'esti deporte puen entendese fenómenos como'l racismu o'l feminismu

'Una historia popular del fútbol' ye un ensayu sobre'l fenómenu deportivu más globalizáu, encaráu dende una perspectiva poliédrica, con intenciones sociolóxiques y antropolóxiques. Correia desplica cómo un negociu tan multimillonariu tamién ye, anguaño, un mediu de resistencia.

L'escritor francés considera que'l fútbol va más allá del espectáculu, ye una metáfora social que nos dexa averanos a los distintos requexos del mundu y entender d'otra miente los fluxos migratorios, el racismu, los nacionalismos y el mesmu feminismu.

Correia desplica d'otra manera por qué'l fútbol ye'l deporte rei. Y por qué los sos avances siempre tuvieron venceyaos a les clases trabayadores.

Diz el so autor que la esencia del fútbol siempre foi d'izquierdes. Por casu, recuerda que'l regate inventáronlu los obreros negros en Brasil.

Jorge Valdano considerólu unu de los meyores llibros sobre fútbol enxamás escritos. Ta asoleyáu pola editorial asturiana Hoja de Lata.