Asturies aprueba la so llei de Memoria Democrática

Obligará al Principáu a asumir los gastos d’inhumación de les foses comunes de la Guerra Civil y del franquismu

Asturies cuenta yá con una Llei de Memoria Democrática qu’obligará al Principáu a asumir los gastos d’inhumación de les foses comunes de la Guerra Civil y del franquismu y qu’afita sanciones d’hasta 150.000 euros pa los qu’estropien estos enterramientos.

Esta nueva normativa salió alantre esti vienres nel plenu de la Xunta Xeneral del Principáu col votu d’IX -qu’impulsó la iniciativa- PSOE, Podemos y Ciudadanos, mientres que Partido Popular y Foro votaron a la escontra por considerala innecesaria y porque ven nella un usu interesáu de la historia que, más que reconciliar, afondará na división de la sociedá.

Sicasí, el portavoz de Foro, Pedro Leal, faló de la llei como la de "Desmemoria democrática" y aseguró que supón "l’antesala de la llei de memoria de pensamientu únicu viniente" na que se parte de "la gran mentira que ye dicir que se ye d’izquierdes o nun se ye democráticu"

"Quieren imponenos la ideoloxía y la historia. Nun esiste la memoria democrática, esiste la democracia, y nun esiste la memoria histórica, esiste la historia, y por más que quieran eso nun va camudar", afirmó’l parllamentariu forista, pal que "esti despropósitu y chapuza llexislativa" namái busca "la venganza, la división y l’odiu y non la reconciliación".