Aumenta l'interés por investigar la minería metálica n'Asturies

Medría de los permisos d'investigación mientres aumenta la estracción nes mines actives

Un total de 26 permisos concedíos pa investigación minera y 24 en tramitación, son les cifres actuales n'Asturies pa la primer fase de lo qu'un día podría ser una mina.

La directora xeneral d'Enerxía, Minería y Reactivación, Belarmina Díaz Aguado, esplicó que, dende esi puntu, hasta facelu realidá, han de pasar, como poco, cinco años.

La Xunión Europea y España marcaron como oxetivu aumentar la minería propia pa ser autosuficientes en material totalmente necesario pa la nuesa vida diaria. Punxéronse fecha: aumentar un 25% en nueve años.

En fase avanzada tán les concesiones pa esplotar l'oru de Salave y fluorita na redolada de La Camocha ente Siero y Xixón.

Nes 75 mines actives, el Principáu afita un aumentu de producción anguaño. Un 18% xubió nun añu la estracción d'oru y un 5% la fluorita.