Entama la restauración del Palaciu de Peñalver

La familia Morenés va invertir 1.200.000 euros

La cara del Palaciu de Peñalver, en Tresona, empieza a sufrir cambeos. La restauración y afitamientu de fachada y torres va entamar a mediaos de xunetu, pero enantes d'entamar coles obres ye necesariu un trabayu d'apuntalamientu y andamiaxe qu'asegure la estructura y minimice los riesgos pa los trabayadores. Esos llabores entamaron yá, mientres se pon fin a la redacción del proyectu.

Ye una obra complexa, pola mala traza na que ta l'edificiu y poles esixencies de Patrimoniu. L'inmueble data del sieglu XV, anque delles partes son anteriores y sufrió distintes reformes nestos seis sieglos.

Eses amestadures, con materiales y técniques nada respetuoses cola catalogación del palaciu como Bien d'Interés Cultural, van ser desaniciaos na fase de restauración.

Devolver el so aspeutu orixinal a esta xoya arquitectónica del conceyu de Corvera ye l'oxetivu de la reforma que se va llevar alantre en dos fases d'aproximadamente seis meses caúna, con un presupuestu que xube a los 1.200.000 euros.