Cuatro ancianes vuelven a les residencies de Grau y El Villar curaes del COVID-19

Les residencies de vieyos d'Asturies rexistraron la muerte de 45 usuarios

Cuatro muyeres de 73, 74, 86 y 93 años tornaron esti martes a les residencies de Grau y El Villar, en Piedrasblancas, tres superar la infección por COVID-19, según informó la Conseyería de Derechos Sociales.

Nel casu de la residencia de Grau, medicalizada tres rexistrase unu de los biltos más importantes de coronavirus n'Asturies, son dos muyeres de 93 y 86 años que tornen al centru residencial tres tar ingresaes nel Hospital Universitariu Central d'Asturies (HUCA).

Nel centru Palaciu El Villar, les altes son dos muyeres de 73 y 74 años, que fueron trataes na Fundación Hospital d'Avilés.

La xerente del ERA, Ana Suárez Guerra, quixo agradecer a tolos equipos de profesionales, tanto del ámbitu sanitariu como del sociosanitariu, "el so trabayu, esfuerzu, dedicación y compromisu nel cuidáu de les persones mayores nesta crisis sanitaria".

Les residencies de vieyos d'Asturies rexistraron la muerte de 45 usuarios desque entamó la pandemia, de los que 19 yeren del centru de Grau.