DREAMgenics investiga la detección precoz de la sordera hereditaria

La empresa asturiana quier adelantar en dos años tratamientos a la carta

Un proyectu européu nel que participa la empresa biotecnolóxica asturiana DREAMgenics investiga la detección precoz de la sordera hereditaria.

En dos años esperen llograr un métodu de cribáu universal rápidu pa diagnosticar el tipu y la causa de la hipoacusia, lo que va dexar adelantar a estos neños un tratamientu a la carta.

Nel viveru, biólogos, discípulos de Carlos López Otín y inxenieros, investiguen ensin pipetes nin microscopios el xenoma de recién nacíos sospechosos de carecer sordera. Unu de cada 1.000 naz sordu y otros cuatro van tener perda auditiva.

El 70% sonlo por heriedu, anque nun conocieren familiar dalgunu con esti defectu. En DREAMgenics estudiaron l'últimu añu 130 casos diagnosticaos, colos que validaron el so cribáu xenómicu pa diagnosticar bien llueu sordera.

En tres años van analizar 400 amueses de sangre y tamién de cuspia de ñácaros, p'atopar los xenes mutaos y sobre manera afayar qué causa la hipoacusia. D'esa forma van poder desarrollar un cribáu universal, cenciellu, eficaz y baratu que puea afitase nos sistemes de salú europeos.

Ye l'oxetivu d'esti proyectu, financiáu con más d'un millón d'euros de los fondos Feder, nel que participen siete hospitales d'España, Francia y Portugal, xunto a esta empresa biotecnolóxica asturiana.

Esa posible ferramienta xenómica de diagnósticu universal va dexar tratar enantes con terapies a la carta, pa que'l silenciu de la sordera seya más curtiu.