Día Rexonal de Senderismu con ruta y reivindicación

Denuncien la parálisis del proyectu de la 'Gran Sienda del Navia'

Que la 'Gran Sienda del Navia' seya por fin una realidá ye la demanda cola que se celebró güei n'Eilao y Bual el Día Rexonal del Senderismu. Los sos impulsores denuncien la parálisis d'un proyectu que dicen ye clave pal futuru de los conceyos del altu Navia.

El proyectu, que naz en 2016 de manes de la Sociedá Amigos de Bual, quier ser una ferramienta pa intentar revitalizar económica y demográficamente los 16 conceyos (nueve asturianos y siete gallegos) que crucia'l ríu Navia.

Proyectu qu'anguaño espera la respuesta del Gobiernu central sobre'l pidimientu del Congresu de los Diputaos d'agostu de 2022 pa declarala como obra d'interés xeneral y incluyila nel Programa de Caminos Naturales del Ministeriu d'Agricultura, Pesca y Alimentación.

Caminar pela 'Gran Sienda del Navia' ye lo que fixeron esta mañana más de 300 aficionaos al monte y el senderismu. Los sos impulsores reclamen financiamientu pa impulsar un proyectu que quier ser motor económicu de la zona.

Dende l'área recreativa de Folgueiróu, n'Eilao, los participantes entamaron una marcha de 17 kilómetros hasta Doiras, en Bual. Un pequeñu tramu de los más de 300 kilómetros cabo'l ríu d'esta gran sienda que cunta col sofitu de colectivos como l'Asociación Pico Castro, d'Eilao. Pela sienda, dicen, pasa bona parte del futuru de la contorna.

Un proyectu que cunta col sofitu de la Federación de Deportes de Monte, Escalada y Senderismu. La 'Gran Sienda del Navia' tien una inversión valorada que ronda los cuatro millones d'euros.