Jorge López ye productor de frutes de la viesca en Mernes

Un trabayu con ganancies estacionales, pero que necesita implicación tol añu

Jorge López desenvuélvese con gran soltura na so plantación de Mernes, n’El Franco. Esti mozu decidió va unos años potenciar una de les sos grandes pasiones, los cultivos de frutes de la viesca. Ente arándanos, mores o bruseles trata d’impulsar un pequeñu suañu nel pueblu franquín.

Na seronda y nel iviernu trabáyase abondo pa caltener el cultivu. Hai que podar y hai que siguir cuidando unes plantes qu’en primavera y branu volverán a dar les sos frutes.

L’altimora y l’arándanu son los sos productos estrella. Son los más demandaos polos veceros que, los más d’ellos, son de fuera del conceyu. El boca a boca ye la so meyor arma pa lluchar escontra les producciones a gran escala.

Tola so plantación tendrá nunos meses un aspectu bien distintu y eso tornaráse en munchu trabayu pa Jorge. Un trabayu mui placenteru, sobre manera cuando llega’l momentu de recoyer les frutes del esfuerzu.​