Asturies utilizará los fondos europeos pa nueves places en residencies y alquileres

El Principáu destinará 62 millones a tresformar el so modelu de servicios sociales

Cerca de 62 millones d’euros de fondos europeos del Plan de Recuperación, Tresformación y Resiliencia destinaránse en tres años a la tresformación del sistema asturianu de servicios sociales, la metá d’ellos dedicaránse a l’adaptación del modelu de cuidaos de llarga duración y promoción de l’autonomía de les persones al traviés de la potenciación de los cuidaos nel llar y l’avieyamientu activu.

La conseyera de Derechos Sociales y Bienestar, Melania Álvarez, dio estos datos al comparecer, a pidimientu de so, énte la comisión de Derechos Sociales del parllamentu asturianu pa informar del trabayu fechu al rodiu de la xestión de los fondos del Programa Next Generation de la Xunión Europea, qu’apurrirán otros 28 millones a les polítiques de remocique de viviendes, a les que’l so departamentu podrá dedicar 82 millones d’euros al traviés de delles víes de financiación.