Avalancha de recursos poles sanciones por saltar el confinamientu

Los abogaos d'Uviéu y Xixón creen que munches multes podrán recurrise

Abogaos esperen una avalancha de recursos escontra les multes pol incumplimientu del confinamientu, dempués de que l'Abogacía Xeneral del Estáu cuestionare públicamente la so llegalidá.

Son multes, por exemplu, por dir mercar a un supermercáu lloñe o por un desplazamientu ensin xustificación.

Pal Colexu d'Abogaos d'Uviéu, el propiu confinamientu venceyáu al estáu d'alarma, y non a una llei orgánica, ye inconstitucional. Pero amás, según los criterios asoleyaos recién pola Abogacía Xeneral del Estáu, la manera en que se multa, apelando davezu a la llei de seguridá ciudadana, ye irregular.

Esti motivu xustificaría'l recuru de les multes, según los colexos d'abogados d'Uviéu y de Xixón.

Hai que sumar, nel casu de los paseos a los perros, que los axentes locales nun puen sancionar porque ye una competencia estatal.

Colexu d'Abogaos de Xixón unvió una circular a los sos abogaos informando sobre la doctrina de l'Abogacía del Estáu. El d'Uviéu recuerda que con independencia de la posible illegalidá de les multes, ye una cuestión de solidaridá cumplir col confinamientu.