Cuasi 3.000 persones morrieron nuna década n'Asturies pola contaminación

Un promediu de 300 muertes al añu, el terceru mayor d'España

Ente l'añu 2000 y el 2009 finaron n'Asturies 2.963 persones por causes atribuyíes a la contaminación. Supón un promediu de cuasi 300 muertes al añu, el terceru mayor del país, tres Guipúzcoa y Madrid.

Son datos d'una investigación fecha pol equipu del físicu Julio Díaz con midíes específiques en toles capitales. Un estudiu más precisu que los internacionales, que yeren la referencia hasta agora.

Uviéu foi la capital de provincia que más díes superó la llende de partícules contaminantes por metru cúbicu d'aire afitada pola Organización Mundial de la Salú. La capital foi amás la cuarta con mayor concentración de dióxidu de nitróxenu.

Na década estudiada, l'Institutu Nacional d'Estadística contabilizó 1.179 finaos por accidentes de tráficu.

Esto ye, según esti estudiu, la contaminación cuasi triplica a la carretera como causa de muerte n'Asturies.