Entama la llimpieza de los ríos pa facilitar el pasu l’agua

Siguen los llabores de llimpieza nes carreteres de Quirós y Proaza

Quitar troncos, matos y cualquier depósitu que puea taponar el pasu l’agua ye lo que toca agora, dempués de la cayida d’árboles nos ríos asturianos, pol temporal de ñeve a entamos d’esti mes.

L’oxetivu ye evitar que los depósitos acumulaos formen preses naturales y con ello, amenorgar el riesgu de que nuevos temporales provoquen crecíes qu’acaben en desbordamientos.

La d’El Ríu Nora ye la primer actuación de les 120 previstes nel Plan de Conservación de la Confederación Hidrográfica del Cantábricu. Un trabayu que se desendolcará nos nueve meses vinientes.

Tamién se fadrán otres actuaciones específiques como’l refuerzu de les muries de marxe que tuvieren afectaes. El proyectu cuenta con un presupuestu que xube cuasi a los 600.000 euros.

Siguen los llabores de llimpieza nes carreteres de Quirós y Proaza

Circular peles carreteres de Proaza y Quirós sigue siendo xera complicada. Cada pocos metros hai rames y troncos nel firme. Yá tán toles víes abiertes al tráficu pero fai falta circular con precaución.

Delles cuadrielles d’operarios llimpien les carreteres y poden rames que tienen peligru de cayer.

Quirós y Proaza tuvieron que subcontratar amás a empreses privaes. Una ayuda que fai falta p’abrir los caminos a pueblos que tuvieron arrequexaos dellos díes. En Proaza entovía queden tres con difícil entrada.

Tener que contratar, por emerxencia, a empreses privaes supón un gastu abondo p’ayuntamientos tan pequeños como los asitiaos nos valles del osu.

El presidente de la Federación Asturiana de Conceyos caltendrá una xunta col Principáu. Va pidir que’l gobiernu asturianu dea ayudes pa facer frente a los costos xeneraos por un temporal qu’afectó más de lo que se pensaba.