Controles nel aeropuertu pa evitar plagues

Mírense equipaxes que vienen de conexones internacionales

Pa evitar la entrada d’especies invasores, la Guardia Civil controla les maletes que lleguen dende países con ecosistemes tropicales y d’Asia. TPA Noticies pasó una xornada colos axentes nel aeropuertu d’Asturies.

Nun hai conexones directes estracomunitaries, pero los vuelos dende América y Asia qu’enllacen vía Londres y Madrid lleguen a la terminal de Santiago’l Monte, onde se faen los controles fitosanitarios de los productos frescos.

Los axentes afirmen qu’hai desconocimientu a esgaya ente los pasaxeros sobre qué puen trayer y qué non, piensen que "nos quiten" alcohol y tabacu, pero eso, que pue suponer un fraude, ye sicasí menos peligrosu.

Los más de los productos frescos que tresporten los pasaxeros son pa consumu propiu, y tamién pa plantar o mezclar con otros cultivos de forma non profesional. Los axentes yá nun s’estrañen d’alcontrar nengún frutu nes maletes, pero traer patates de países tropicales ye abondo más normal de lo que se puea pensar.

Pa completar el control de les maletes, tamién en vuelos nacionales, la Guardia Civil cunta con un axente especial, Alaska. La so misión ye goler lo que la nariz humana nun pue: droga oculta.

Pasea ente los equipaxes cola efectividá d’una máquina y cuando para un segundu delantre d’una maleta, l’axente sepártala, déxa-yla un pocoñín y les más de les veces devuélvela cola mesma indiferencia. El volume d’equipaxes ye tan grande, que munchos controles son al debalu.

Alaska y los demás perros de drogues y esplosivos controlen tamién les mercancíes n’El Musel y otros cais.