D'Arnáu a L'Arena, una sienda que dalgunos llamen 'la ruta de los marineros'

Una ruta na que les sableres garren principal protagonismu

La primavera convida al senderismu y a pasiar ensin más pretensiones qu'esfrutar del paisaxe. TPA Noticies propón-yos percorrer la ruta d'Arnáu a L'Arena, de dificultá media, que pue faese en familia, y na que les sableres garren principal protagonismu.

Son 17 kilómetros de xubíes y baxaes, con un desnivel d'unos 560 metros, que puee faese tamién en bicicleta. De mano la caminata sal per detrás del pueblu d'Arnáu.

Dende'l primer mirador qu'atopamos vemos la islla de La Lladrona. Siguimos la baxada hacia Santa María del Mar / El Puertu, la sablera de Baínas, la sablera de Muniellos y el Centru d'Interpretación del Planu Inclináu de Bayas, onde entá hai resclavos de la producción, de cinc de los años 40 n'Arnáu.

Equí vese l'edificiu qu'allugaba los motores pa xubir los regodones de los cantiles, y la torre eléctrica qu'alimentaba los sos motores.

Siguimos caminando y la siguiente parada facémosla nel mirador de La Deva, dende onde pue vese la islla del mesmu nome, espaciu protexíu declaráu monumentu natural y la mayor de les islles de la mariña asturiana.

La ruta tamién nos lleva al mirador de Bayas, dende'l que tenemos vistes espectaculares de la so sablera, la sablera de Los Quebrantos o la ría de San Esteban.

Vamos siguir en parte la llamada 'Sienda Norte' hasta llegar al puertu deportivu. Dempués entramos nun senderu que nos lleva al pueblu d'El Castillu, en Sotu'l Barcu, que va ser el final del nuesu percorríu.

Equí quedamos, esfrutando d'este pueblín de pescadores, en L’Arena, con un pequeñu cai de madera y una gran fortaleza.