Dos empreses asturianes de tresporte estudien demandar a NMR por impagos

Embargáu un barcu de NMR n'El Musel por impagu d'una delda

Polo menos dos empreses asturianes tán estudiando llevar a los tribunales a NMR pol impagu de los sos servicios de tresporte de carbón a El Musel. Sobre manera dempués de sabese que tres la denuncia d'una empresa tresportista de Lleón a la que debe más de 125.000 euros el xulgáu de lo mercantil númberu 3 de Xixón decidió embargar 47.000 tonelaes de carbón que taben siendo cargaes nesti buque n'El Musel.

La intención de NMR yera la de poner en funcionamientu delles esplotaciones mineres na rexón, amás d'importar, peñerar y esportar mineral. Con ello quería xenerar miles de puestos de trabayu. Asina lo aseguraron nuna entrevista dada'l pasáu mes d'ochobre a TPA Noticies Matinal.

Sicasí en malapenes cinco meses son yá delles les subcontrates que denuncien impagos. Y nun son el so únicu problema. El Principáu paralizó-yos la esplotación de magre en La Espina énte la denuncia de robu de mineral por parte d'una esplotación cercana.

L'Autoridá Portuaria de Xixón, que-yos arrienda l'espaciu, nun quier faer declaraciones nin confirmar si tamién-yos debe l'arriendu. Tampoco la compañía quier faer comentarios.

La firma patrocina amás al Real Uviéu. El club ta suxetu a un contratu de confidencialidá col patrocinador pero amiesta que los retrasos, si se dan, sedríen los normales nesta dómina de pandemia. Amás, afita qu'estos ingresos nun son significativos nin ponen en riesgu la economía del club.