El Muséu del Prerrománicu de Salas abre les sos puertes

Amuesa una ventena de pieces singulares

En Salas inauguróse esta mañana’l Muséu Prerrománicu de Samartín, una iniciativa del Aula y la Fundación Valdés Salas. Amuesa una ventena de pieces singulares, representatives del arte asturianu que fueron sacaes en 1980 de la ilesia de Samartín.

Una colección única qu’afita que la etapa final del prerrománicu ta abierta a nueves influyencies, ensin perder les sos tradiciones.

Na colección alcontramos llábanes epigráfiques que recueyen la historia de la ilesia y una decoración escultórica de primer orde, con ventanes, dinteles o capiteles. D’ente les pieces destaca, sobre manera, la llamada Cruz de Salas.

Hasta agora amosábense na torre del Castiellu de Salas, un escenariu únicu pero non mui accesible. Agora tienen un espaciu espositivu propiu que sedrá una referencia pal estudiu del prerrománicu.

El proyectu foi posible gracies al Aula d’Estensión Universitaria y la Fundación Valdés Salas, col sofitu económicu de Liberbank y la collaboración del Ayuntamientu de Salas y el Principáu d’Asturies.