El TCXA valta'l retayu de profesores de sofitu pa esti cursu n'Asturies

La sentencia considera que se frayen los derechos fundamentales d'un neñu con trestornu del espectru autista

El Tribunal Cimeru de Xusticia anuló parte de la circular que la Conseyería d'Educación unvió a los centros a principios d'esti cursu.

En concreto anula'l retayu del personal de sofitu a los alumnos con necesidaes especiales.

La sentencia considera qu'esa circular fraya los derechos fundamentales d'un neñu con trestornu del espectru autista. La so familia denunció la situación.

La familia demandante reclamó a principiu de cursu que'l so fíu, un neñu con trestornu del espectru autista, recibiera sofitu intensivu y individual nel centru escolar. La Conseyería negóse. Alegó qu'esa atención recibiríase dientro d'un grupu con otros alumnos con necesidaes. Una sentencia da-yos la razón a ellos y a tolos qu'esti cursu tuvieron na so situación.

Dende setiembre desanicióse n'Asturies la figura del profesional qu'atiende individualmente a alumnos con necesidaes especiales. La sentencia almite que'l retayu d'esti personal va a la escontra de los principios de la educación inclusiva.

Tres conocer la sentencia, el sindicatu ANPE esixó la inmediata dimisión de la conseyera y Suatea recuerda que yá en setiembre denunciaron que'l retayu diba a la escontra de la mesma llei educativa.