L'impactu de la sesta fola impulsa otra vuelta'l teletrabayu n'Asturies

Unos 3.000 funcionarios del Principáu tán en teletrabayu a turnos

La sesta fola forzó la vuelta al teletrabayu n’abondes empreses y instituciones. Unos 3.000 funcionarios del Principáu tán en teletrabayu a turnos burbuya dende finales d’avientu.

Un alcuerdu asoleyáu nel BOPA dexa esta organización ensin contraprestación económica. Una solución d’urxencia pola sesta fola, según CSIF, qu’avisa qu’entá ta pendiente l’aprobación del decretu.

La medría de contaxos forzó’l teletrabayu n’empreses que yá lu dexaren atrás, como pasa con Seresco con unos 700 trabayadores, o la inxeniería Impulso Industrial Alternativo, con 65.

Tamién n’instituciones como la Fundación Princesa d’Asturies, onde se volvió al teletrabayu en mou mestu, col mínimu equipu presencial.

N’Arcelor tamién decidieron unviar a trabayar a casa a tolos que puean, unos 1.000 trabayadores. Una midida que se rescata, como en foles anteriores, ye’l control de temperatura n’entraes o’l pieslle del comedor.

Empreses como estes xúnense en teletrabayu a les que nunca nun lu dexaron, como Dupont, que siempres caltuvo’l trabayu en casa como opción preferente.