El pozu Carrio recupera l'actividá reconvertíu al sector agroalimentariu

Sodeco y Hunosa impulsen 'AgroCarrio Fórum Alimentario'

Cuarenta y cinco empreses agroalimentaries roblaron güei con representantes del Gobiernu asturianu un manifiestu col que se comprometen a axuntar esfuerzos pa potenciar el sector y crear un polu de conocencia y alcuentru dende les instalaciones qu'Hunosa apurrió nel antiguu pozu Carrio, en Llaviana.

La firma tuvo llugar na presentación del AgroCarrio Fórum Agroalimentario celebráu güei neses instalaciones y que foi entamáu pola Sociedá pal Desenvolvimientu de les Comarques Mineres (SODECO) en collaboración col Grupu Hunosa.

L'actu cuntó cola presencia del presidente del Principáu, Adrián Barbón, de los conseyeros d'Industria, Enrique Fernández, y Ciencia, Borja Sánchez, del alcalde de Llaviana, Julio García, y del presidente d'Hunosa, Gregorio Rabanal, y de representantes d'empreses como Capsa Food, TSK o Gonvarri, y de distintos espertos en biotecnoloxía.

AgroCarrio naz cola misión de crear capacidaes, identificar enclinos, oportunidaes y tresferir conocencia pa meyorar la competitividá d'unu de los sectores de mayor dinamismu y una de les principales fontes de riqueza d'Asturies, según los sos promotores, que van apurrir espacios físicos onde allugar entamadores, nueves iniciatives tecnolóxiques, desenvolver proyectos d'innovación y apurrir formación técnica y d'altu impactu.