Escanciáu al empar pa que la cultura sidrera seya Patrimoniu de la Humanidá

Actos simbólicos que se celebraron en cerca d'una trentena de conceyos asturianos

Cerca d'una trentena de conceyos asturianos participaron esti mediudía n'escanciaos al empar pa sofitar asina la candidatura de la cultura sidrera asturiana pa la declaración como Patrimoniu Inmaterial de la Humanidá pola Unesco.

Actos simbólicos promovíos pol Principáu y la Denominación d’Orixe Sidra d'Asturies pa destacar la socialización alredor d’esta bébora.

Güei yera'l día de facer ver lo que significa la sidra n'Asturies pa productores de mazana, llagareros, hosteleros y pa los asturianos en xeneral. Nava, Uviéu, Mieres o Xixón fueron dalgunos de los llugares que más persones xuntaron.

En Nava, conceyu sidreru sobre manera, sede del muséu de la sidra d'Asturies, cerca de 200 persones xuntáronse pa demostrar la importancia de la cultura sidrera.

Dende esta mañana, xixoneses y visitantes puen amosar el so sofitu a la candidatura de la cultura sidrera. A disposición del públicu hai dos llibros de firmes na villa, pa que tol que lo desee, estampe la so robla.

Con esta acción, búscase implicar a la ciudadanía na defensa de la cultura sidrera y axuntar a otres iniciatives del conceyu, como la llume en verde de la fachada del consistoriu.

N'Uviéu, la cai Gascona axuntó a tolos que quixeron escenificar el so sofitu na capital asturiana. Son munches les persones que roblaron en toa Asturies pa sofitar la cultura sidrera como patrimoniu de la humanidá, nuna xornada na que sol, música, tradición y sidra fueron los protagonistes.